ഋതുഭേദം/ നസീം ഷഫായ്- കശ്മീര്‍
ചോദിച്ചു ഞാന്‍ പനിനീര്‍ പൂവിനോട്:
“എവിടെപ്പോയി നിന്‍റെ സൗരഭ്യം?”
അത് പറഞ്ഞു:
“അതിനെ എടുത്തു മാറ്റി, ശരത്കാലം.”
ചോദിച്ചു ഞാന്‍ വസന്തത്തോട്:
“എന്താണ് നിന്‍റെ നെറ്റിത്തടത്തില്‍ വരകള്‍?”
അത് പറഞ്ഞു:
“എന്‍റെ മുറിവുകളില്‍ ഉപ്പ് തേയ്ക്കപ്പെട്ടിരിയ്ക്കുന്നു.”
അതിനാല്‍
ഉപേക്ഷിച്ചു ഞാന്‍,
ഒരിക്കല്‍ പൂത്തുലഞ്ഞു നിന്നിരുന്ന ഉദ്യാനത്തെ.
അതില്‍ പിന്നെ
അലഞ്ഞു നടക്കുകയാണ്, ഞാന്‍
ലക്ഷ്യമില്ലാതെ.
ഹേമന്തത്തെ വസന്തമാക്കിയതെന്ത്?/
ലീന ഡ്രസ്ക്കീന്‍ – ലിത്വാനിയ
ഓര്‍ത്തു നോക്കുക,
ഇന്നലെയെക്കുറിച്ച്,
പിന്നിട്ട ആഴ്ചകളെക്കുറിച്ച്,
നന്നായി പെയ്തിരുന്നു മഴ;
ചില ദിവസങ്ങളില്‍ ചെറുതായും.
എന്താണ് സംഭവിച്ചത്? മഞ്ഞ് പൊഴിയേണ്ടേ?
ജനുവരി! ഇത് നീയാണോ?
അറിയില്ലെനിക്ക്.
ആഹ്! മഴ പെയ്യട്ടെ, കാറ്റു വീശട്ടെ.
എന്തായാലും
താഴെയുള്ള എല്ലാറ്റിനേയും മൂടുന്ന
വെളുത്തതും ലോലവുമായ മഞ്ഞിനെ
ഇഷ്ടപ്പെടുന്നു, ഞാന്‍.
എന്നാല്‍,
കാലത്തിന്‍റെ ഇന്ദ്രജാലം:
വ്യത്യസ്തം, ഉദാത്തം.
കാലത്തിന് മുന്‍പെ അവ എത്തിയെന്ന്
വിശ്വസിക്കാന്‍ കഴിയില്ലെനിക്ക്.
സൂര്യപ്രകാശത്തെ ചിറകില്‍ പിടികൂടിയോ,
സുന്ദര ഹേമന്തം?
ഹേമന്തം ഇന്ന് കൊണ്ടുവരുന്നത് ഇതാ ഇവിടെ.
പുഷ്പ്പിക്കുന്നു പൂക്കള്‍.
പാടുന്നു, ഉഷ്ണമേഖലയിലെ പക്ഷികള്‍.
ഇത് ശരിക്കും വസന്തമാക്കുന്നു, ഹേമന്തത്തെ.