ഉത്രാടരാത്രിയിലിന്നലെ ഞാനെൻ്റെ
മാനസമുറ്റമണിയിച്ചൊരുക്കവേ,
എത്തിടും നാളെയെൻ വീട്ടിലും മാവേലി
ഓണദിനത്തിൻ സ്മരണയുമായ്…!
കാത്തുഞാനിത്രയും നേരമിരുന്നിട്ടു
മെന്നിട്ടുമെത്തിയതില്ലെൻ്റെ മാവേലി!
ഓർക്കുന്നു ഞാനിന്നുമെൻ്റെ ബാല്യത്തിലെ
ഓണസ്മരണയെ പൂവണിയിക്കട്ടെ:
പൂക്കളം തീർക്കുവാനന്നെൻ്റെ ആഗ്രഹം
പൂവട്ടകയേന്തിപൂ പറിച്ചീടുമ്പോൾ,
അത്തത്തരുണിയെ ഉത്രാടരൂപനു
വേളികഴിച്ചു കൊടുക്കുവാനായന്നു
പൂക്കളമാല്യങ്ങൾ കോർക്കുന്ന നാളുകൾ…!
എന്നിലെ ശൈശവ ഭാവശില്പങ്ങൾക്കു
കൗതുകം മണ്ണിനാൽ രൂപമേകീടുന്നൂ
ഓണപ്പുലരിക്കതിരിനെവെല്ലുമെ-
ന്നമ്മയണിയുമരിമാവിൻ വെൺമയും!
തൃക്കാക്കരപ്പനെ പൂമൂടിവെച്ചു ഞാൻ
നിർവൃതി തൻ ഇളനീരുതിർക്കുന്നൂ !
നിന്നെ പ്രതീക്ഷിച്ചിരിക്കുന്നുപിന്നെയും
എൻ്റെ സ്വപ്നത്തിലെ പാതാളലോകത്തിൽ
നിൻ രൂപം ദൃശ്യമാകുമ്പൊഴേ ഓർക്കുന്നു
വാമനത്വത്തിലെ ഭീമസ്വരൂപത്തെ!
വർഗ്ഗാധികാരത്തിൻ ഓലക്കുടക്കീഴിൽ
ബ്രാഹ്മണ്യം പേറും കമണ്ഡലുവുമായ്
ഇന്നെത്ര വാമനരൂപങ്ങൾ നിന്നുടെ
യജ്ഞയാഗാദിക്കു ഭംഗമേകീടുവാൻ
വഞ്ചകപാദരാ മൂന്നാമതായീടും
വിശ്വാസവഞ്ചകപാദത്തെ നിന്നുടെ
നെഞ്ചിന്നു നേർക്കായ്